晨早八點，天文台話紫外線指數0.4，即係話今日冇乜太陽。尋晚又捱夜，體力得返5%，諗住落街口搵阿駿買杯靚咖啡醒神，但雙腳一掂地就縮返轉頭——算啦，留喺屋企沖杯即溶咖啡仲實際。話時話，即溶咖啡沖得好都係一門學問：水溫唔可以太滾，奶要後落，攪拌要順時針（純粹個人迷信）。飲一啖，咦，又幾好飲喎。有時將就吓，都係一種幸福。